Ҳозирда Криштиану Роналдунинг "Реал"ни тарк этиши ҳақида тез-тез хабарлар тарқалмоқда. Келгусида нима бўлиши номаълум. Лекин ҳар қандай ҳолат ҳам рўй бериши мумкин. Шу билан бирга бу ибора Роналдунинг келажагига ҳам боғлиқдир. Биз қуйида унга "Реал"да нималар халал бераётгани ва унинг кетишига сабаб бўлувчи омиллар ҳақида тўхталиб ўтамиз.

5. Жамоанинг сусайиши



2014-йилги клублар ўртасидаги жаҳон чемпионатидан сўнг «Қироллик клуби» ҳеч қандай турнирда ғалаба қозона олмади. Бу эса доим ғолибликка ўрганган футболчи учун қониқарли натижа эмас. Агар ушбу мавсум якунида ҳам «Реал М» жиддий турнирларда муваффақиятсизликка учрайдиган бўлса бу Роналдунинг жамоани тарк этишига олиб келиши мумкин.

4. Мухлисларнинг норозилиги



Роналду «Манчестер Юнайтед» дан «Реал М» га ўтгандан бери жамоанинг кўплаб ютуқларга эришишида асосий фигура бўлди. 2014-йилги Мадрид жамоасининг Европа чемпионлар лигасидаги ғалабасида ҳам унинг ўрни беқиёс. Лекин ўтган мавсум сўнги ўйинларидан бирида бевосита ўйингоҳнинг ўзида «Реал М» фанатлари унга нисбатан норозилик қилишди. Бу Роналдунинг жахлини чиқаргани аниқ. Агар бу ҳол яна такрорланадиган бўлса «Қироллик клуби» мухлисларининг ўзи унинг жамоадан кетишига сабаб бўлиб қолишлари мумкин.

3. Бош мураббий билан алоқа


Роналду қанчалик кучли футболчи бўлмасин,барибир у жамоа бош мураббийининг қарорларига бўйсуниши шарт. Карло Анчелотти истеъфога чиқарилиб Рафа Бенитес жамоани қабул қилиб олгач, унинг ўйин фалсафаси ва тактикасига мослаша олмаган ўйинчилар топилди. Биринчилардан бўлиб бу борада Криштиану ўз қарашларини билдирди ва шу тариқа янги мураббий билан келишмовчилик бошланди. Жамоанинг айни пайтдаги ўйинларини кўриб улар орасида илиқ муносабат борлигига ишониш қийин. Айнан шу омил ҳам Роналдунинг жамоасини алмаштиришига сабаб бўлиши мумкин.

2. Гарет Бейл


Роналду «Қироллик клуби» билан кўплаб ютуқларга эришган ва доим уларнинг асосий сабабчиси дея эътироф этиб келинган. Анчелотти даврида бу билан боғлиқ ҳеч қандай муаммо бўлмаган. Чунки италиялик мураббий жамоа ўйинини Роналду орқали ташкил этган. Лекин Рафа Бенитес бундай иш тутмаяпти. Унга кўра ўйин тактикасини Бейл орқали қурилишига ҳаракат қилинмоқда. Биз биламизки Роналду ҳар доим жамоасининг асосий ўйинчиси бўлишга ва диққат маказда ҳам айнан ўзи туришига ўрганиб қолган. Бейлнинг жамоада асосий фигурага айланиши ҳам унинг янги клуб танлаши учун сабаб бўлиши мумкин.

1. Бошқа грандларнинг чорлови


Роналду «Манчестер Юнайтед» ва «Реал М» жамоалари билан Европа чемпионлар лигасида ғалаба қозонган. Ушбу жамоалар Криштианунинг ёрдами билан бу совринларга эришган. Ҳозирда унинг собиқ жамоаси «Қизил иблислар» ва Франциянинг «ПСЖ» клуби томонидан Роналдуга улкан даражада қизиқиш билдирмоқда. Чунки улар чемпионлар лигасининг бош совринига ва бошқа турнирлар ғолиблигига эришмоқчи. Бу йўлда Роналдунинг хизматига эҳтиёж бор ва айнан ушбу жамоаларда у ўзи севадиган танҳоликни, мутлоқ эркинликни қўлга киритиши мумкин. Бу омиллар ҳам Криштиану Роналдунинг «Реал М» ни тарк этишига сабаб бўлиши мумкин.