ФИФА фавқулотда вазиятлар қўмитаси кеча ЖЧ-218 ва ОК-2019 қўшма саралаш босқичи доирасида Фаластин ва Саудия Арабистони жамоалари ўртасидаги ўйин юзасидан йиғилиш ўтказди. Мажлисга шайх Салмон бин Иброҳим ал-Халифа (Баҳрайн) раислик қилди. Шунингдек, унда Хуан Анхель Напут (Парагвай) ва Мишель Д'Хуге (Бельгия) иштирок этишди.
Йиғилиш давомида Фаластинда ўтиши режалаштирилган ўйиннинг хавфсизлик масаласи муҳокама қилинди. Фаластин ҳукумати ўйинни ўтказиш билан боғлиқ масалаларда энди кафолат бера олмаслигини тасдиқлади. Шу боис ФИФА фавқулотда вазиятлар қўмитаси учрашувни нейтрал майдонда ўтказиш бўйича қарор қабул қилди.
Фаластин-Саудия Арабистони учрашуви аввал режалаштирилганидек 5 ноябрь куни эмас, 9 ноябрь куни нейтрал майдонда ўтказилади. Шунингдек, фаластинликларнинг 12 ноябрга режалаштирилган Малайзияга қарши учрашуви ҳам бетараф мамлакатга кўчирилди.
Фаластин томони мазкур иккита ўйин учун Осиёнинг қайси мамлакати ва стадионини танлашини ФИФАга хабар бериши керак.
Эслатиб ўтамиз, Саудия Арабистони терма жамоаси 5 ноябрда Рамалалоҳ шаҳрига белгиланган ўйинга боришдан бош тортгани ҳақида ФИФАга мактуб йўллаганди.
