Ўзбекистон миллий терма жамоаси пойтахтимизда йиғин бошлагани ҳақида хабар берган эдик.
КХДР ва Яманга қарши баҳсларга тайёргарлик олиб бораётган Самвел Бабаян шогирдлари “Жар” стадиони майдонида шуғулланишмоқда. Бугун бош жамоамиз мазкур йиғин доирасидаги иккинчи кунги машғулотларни ўтказди.
Машғулот аввалида мураббийлар штабидан керакли кўрсатмаларни олган футболчилар дастлаб енгил югуриб олишди ва машғулотга киришишди.
Кечагидан фарқли ўлароқ бугун деярли барча тўп билан ишлади. Фақатгина Фозил Мусаев индивидуал тарзда шуғулланди.
Хабар берганимиздек, ҳозирча йиғинда асосан миллий чемпионатимизда тўп сурувчи футболчилар қатнашишмоқда. Легионерлардан Азизбек Ҳайдаров, Анзур Исмоилов,Сервер Жепаров ва Фозил Мусаевлар пойтахтимизга етиб келишган. Қолган легионерлар эса 8 ноябр кунига қадар терма жамоа ихтиёрига етиб келишади.
Таъкидлаш жоизки, машғулотлар анча ранг-баранг тарзда олиб борилмоқда.
Машғулотларда барча ҳам чин дилдан меҳнат қилмоқда.
“Насаф” аъзоси Одил Ҳамробеков ҳам йиғинда ўзини кўрсатишга уринмоқда.
Терма жамоадан чақирув олгани кўпчилик учун кутилмаган хабар бўлган Камолиддин Тожиев ҳам машғулотларда яхши иштирок этмоқда.
Тажрибали Игнатий Нестеров Александр Лобанов ҳамда Муроджон Зухуровларга ҳар тарафлама ўрнак бўлишга уриняпти ва ўзининг улкан тажрибаси билан бўлишмоқда.
Сервер Жепаров эса доимгидек машғулотда чин дилдан ишлаяпти. Унинг бу жиҳатига қойил қолмай илож йўқ.
Терма жамоамизнинг навбатдаги кунги машғулоти шу тариқа ўтди. Эртага ҳам туркум репортажларимизни давом эттирамиз…