Мадриднинг «Реал» клуби ҳужумчиси Гонсало Гарсия фаолиятини Италия А Сериясида давом эттириши мумкин. Бу ҳақда Италиянинг нуфузли Tuttosport нашри хабар бермоқда.

Манбанинг берган маълумотларига кўра, Туриннинг «Ювентус» клуби 22 ёшли испаниялик иқтидорли форвардни ўз сафига қўшиб олишга жиддий қизиқиш билдирмоқда. Ҳозирда икки гранд клуб ўртасидаги музокаралар бироз суст бўлса-да, давом этмоқда.

Қайд этилишича, ушбу трансфер оддий ижара шартномаси бўлмайди. Томонлар футболчининг тўлиқ трансфер ҳуқуқини сотиб олиш борасида келишишмоқда. Бироқ «Реал» Мадрид клуби шартномага кейинчалик футболчини маълум бир маблағ эвазига қайта сотиб олиш (обратный выкуп) ҳуқуқини берувчи махсус бандни киритишни талаб қилмоқда.

Маълумот учун, Гонсало Гарсия «Реал» академияси тарбияланувчиси ҳисобланади. Унинг «Қаймоқранглилар» билан амалдаги шартномаси 2030 йилнинг 30 июнига қадар мўлжалланган.

Ортда қолган 2025/26 йилги мавсумда ёш ҳужумчи Мадрид клуби таркибида барча турнирларда 39 та учрашувда майдонга тушиб, ўз ҳисобига 8 та гол ва 3 та голли узатма ёздириб қўйишга муваффақ бўлди. Айни дамда нуфузли Transfermarkt портали Гарсиянинг трансфер қийматини 30 миллион еврога баҳоламоқда.