Ёшлар лигаси дебютанти саналган “Қўқон-1912” жамоаси ўринбосарлари мақташга арзигулик натижаларга эришмоқда. Бугунги мақоламизда улар ҳақида бироз мушоҳада юритамимз.
Чемпионлик тақдири
Ўринбосарларимиз айни дамда мусобақа жадвалида 42 очко билан 6-ўринда боришмоқда. Сўнгги турда ғалабага эришилса, натижа бундан ҳам яхши бўлиши мумкин.
Айтганча, 19 ноябрь куни “Бунёдкор” ўринбосарларига қарши бўладиган ўйин Ёшлар лигасида ким ғолиб бўлишига ойдинлик киритиб беради. 29-турдан кейин Ёшлар лигасида кичик олтин медал учун кураш олиб бораётган “Бунёдкор” ва “Пахтакор” ўринбосарлари ўртасидаги фарқ бир очкони ташкил этмоқда. Ўринбосарларимизга қарши кечадиган ўйиндаги очко йўқотилиши “Қалдирғочлар”ни чемпионликдан маҳрум этиши мумкин. Демак, кимнинг чемпион бўлиши айнан мана шу баҳсга боғлиқ, десак муболаға бўлмайди.
Мағлубиятсиз сериялар
Биринчи даврада ўринбосарларимиз 12 учрашувда мағлубиятга учрамаган эдилар. Иккинчи давра бошида бироз барқарорликни йўқотган ёшлар жамоамиз сўнгги бешта ўйинда ҳам майдонни мағлуб бўлмаган ҳолда тарк этишмоқда. Муҳсин Низомиддинов бошқарган жамоа охирги марта 30 сентябрь куни Ғузорда “Шўртан”га ютқазиб қўйган эди. Кейинги бешта учрашувнинг иккитасида ғалаба қозонилди. Учтасида эса дуранг натижа қайд этилди.
Дарвоқе, ҳозирги кунга келиб, Ёшлар лигасида энг кўп дурангга эришган жамоа айнан бизнинг ўринбосарларимиз бўлиб туришибди. 29-турдан кейинги статистика қуйидагича: 10 ғалаба, 12 дуранг, 7 мағлубият.
Қўқонда ёш иқтидорли футболчилар жуда кўп. Ўринбосарларимиз сафида тўп сураёган кўплаб ўйинчиларнинг ҳаракатларини кўриб жамоанинг келажаги ишончли қўлларда эканлигига амин бўламиз.
Кези келганда, мураббийлар штабининг бу борада катта ҳажмдаги ишни амалга оширишгани таъкидлаш жоиз.
Ўринбосарларимизга сўнгги турда ҳам омад тилаб қоламиз.
