Жорий мавсумда ҳам Ўзбекистон чемпионатида янги номлар пайдо бўлди. Мавсум-2015 кашфиётларидан бири – Отабек Ҳайдаровдир.

Ўтган йили биринчи лигада сермаҳсул ҳужумчилардан бири бўлган Отабек Ҳайдаров Олйи лигада ҳам тўпурарлик маҳоратини намойиш этди. Биринчи даврани “Нефтчи”да ўтказган 23 ёшли ҳужумчи фарғоналикларга қимматли очколарни тақдим этган бир нечта голларнинг муаллифига айланганди.

Аммо негадир “Нефтчи” жамоаси раҳбарияти ушбу ҳужумчини “Қўқон-1912”га ижарага беришга қарор қилишди. Натижада Отабек ўзи учун бегона бўлмаган клубда ўзини кўрсата олди. Ҳайдаров иккинчи даврада рақиблар дарвозасига олтита тўп киритишнинг уддасидан чиқди. Голларнинг учтаси чемпионат пешқадамлари дарвозасига киритилгани эътиборга молик. Аниқроғи, Отабек миллий терма жамоамиз посбонлари – Лобанов (битта) ва Нестеров (иккита)ларни доғда қолдиришга муваффақ бўлди. Бундан ташқари, бу ҳужумчи “Андижон” (иккита) ва “Сўғдиёна” (битта)  дарвозасини ҳам ишғол этган.