Испания чемпионатининг 12-тури доирасида "Реал" ўз майдонида "Барселона"ни қабул қилди ва азалий рақибига йирик ҳисобда имкониятни бой бериб қўйди.  

Ўйин бошидан "Барселона" назоратни қўлга олди ва ўзи истаган услубда ўйнади. "Реал" эса рақибнинг ўйинини "томоша" қилди. Барча голлар комбинацион ҳужумлардан кейин бирга-бир вазиятда урилди. Луис Суарес ўз ҳисобига иккита гол ёзган бўлса, Неймар ва Иньеста бир мартадан рақиб дарвозасини ишғол қилишди.

"Реал"да имконият бўлмадими? Бўлди, албатта. Масалан, Роналду икки марта, Бензема бир марта яккама-якка вазиятдан фойдалана олишмади. Умуман олганда, Клаудио Браво бугун жуда зўр ўйнади  ва "Мадрид"нинг барча зарбаларини қайтарди.

Ўз навбатида "Барселона" камида яна 4та гол уриши мумкин эди. Мунир бироз иккита ҳолатда шошма-шошарлик қилган бўлса, айрим вазиятларда ҳимоялар хушёр ўйнашди.

Ўйин бошида стадионга йиғилган мухлислар оқ мато билан стадионни қаймоқрангга буркаган бўлишса, ўйиндан кейин улар ўша оқ рўмолчани "Реал" футболчиларига силкитишди.

Ушбу ғалабадан кейин "Барселона" "Қироллик клуби" билан очколар фарқини 6тага етказиб, яққол пешқадамлик позициясини мустаҳкамлади.

Испания Ла лигаси, 12-тур
"РЕАЛ МАДРИД" - "БАРСЕЛОНА" - 0:4
Голлар: 0:1 – 11 Суарес, 0:2 – 39 Неймар, 0:3 – 53 Иньеста, 0:4 – 74 Суарес.
Реал Мадрид – Навас, Варан, Марсело (Карвахаль, 59), Данило, Рамос, Хамес (Иско, 55), Кроос, Модрич, Бэйл, Роналду, Бензема.
Барселона – Браво, Пике, Альба, Дани Алвес, Ракитич (Месси, 57), Бускетс, Иньеста (Мунир, 77), Маскерано (Матье, 27), Серджи Роберто, Неймар, Суарес.
Огоҳлантиришлар: Хамес (23), Дани Алвес (31), Рамос (51), Карвахаль (83), Бускетс (90).
Четлатиш: Иско (84).