“Оқ-тепа” – “Сўғдиёна” жамоалари ўртасидаги ўтиш ўйинидан кейин иккала жамоа бош мураббийлари ОАВ ходимларининг саволларига жавоб қайтарди.

"Шогирдларимнинг ҳаракатларидан уялмайман. Улар олий лига жамоасига муносиб тарзда қаршилик кўрсата олишди. Футбол хатоларсиз бўлмайди. Албатта, бугун ҳам қаерлардадир хатога йўл қўйдик, лекин рақиб дарвозасини ишғол қилиш учун бир қатор имкониятларга эга бўлганимизни ҳам барча кўрди. Бироқ Темур Ҳакимов, Абдул Азиз Юсуповга тажриба етишмади. Ўйлашимча, бугунги ўйин мухлисларга ёқди. Биринчи лигада ҳам ўйинлар шундай стадионларда ўтказилганида яхши бўларди. Чунки биз ишқибозлар учун ўйнаймиз.

Биз 7 ноябрда сўнгги расмий ўйинни ўтказгандик. Шундан кейин деярли 18 кун танаффусга эга бўлдик. Албатта бу катта танаффус. Шундай бўлса-да, футболчиларнинг жисмоний ҳолатини тиклашга ҳаракат қилдик. Бу орада иккита ўртоқлик учрашувини ташкил қилдик. Аксига олиб, иккала ўйин вақтида ҳам ёмғир ёғиб, табиий майдоннинг ва ўйиннинг сифатига таъсир қилди. Қолаверса, биз йил давомида расмий-норасмий ўйинларни қўшиб ҳисоблаганда 58та учрашув ўтказдик. Тинмасдан ишлатаверсангиз темир ҳам сифатини йўқотади, футболчилар эса, инсон. Гапларимнинг ҳеч бири ўзимизни оқлаш учун эмас, шунчаки, факт. “Сўғдиёна” жамоасини олий лигада қолгани билан табриклайман!", - дейди Сакаев.