Кўпчилик футбол мухлисларига маълумки 2012 йили Вадим Абрамов бошқарувидаги Ўзбекистон Олимпия терма жамоаси аламли тарзда Лондон-2012 Олимпиадаси йўлламасидан маҳрум бўлди.
Шундан кейин навбатдаги Рио-2016 йил учун янги олимпия терма жамоасини шакллантириш Алексей Eвстафеев зиммасига юклатилди ва 2012-2013 йилларда бу жамоани шакллантириш учун иш олиб борди. Абрамов Бразилиядаги мундиал йўлида биринчи мағлубиятдан сўнг бошқарувни Қосимовга топширди.
Қосимов ўз навбатдаги бевосита Олимпия термасига ҳам жавобгарлардан бирига айланди. 2014 йилда энди Олимпиячиларимиз бошқарувига Шуҳрат Мақсудов тайинланди.
Таиланддаги "Қирол кубоги"дан сўнг шахсан Мираброр Зуфаровичнинг қарори билан Мақсудов бошқарувни топширди. 2014 йили сентябрда Инчеонда бўлиб ўтган Осиё ўйинларида эса Олимпия термасини Қосимов майдонга бошлаб тушди.
2015 йил бошида эса энди Олимпия бошқаруви Бахтиёр Ашурматов зиммасига ўтди. Ашурматовнинг Осиё чемпионати саралашидаги ўта муваффақиятсиз иштирокидан сўнг Мираброр Усмонов Олимпия терма жамоасини Виктор Жалиловга топширди.
Жалилов жамоани қабул қилиб олганига қарамай Дилшод Нуралиев Олимпия терма жамоасини турнирларда бош мураббий сифатида олиб юрди. Бугун бу жамоа энди Самвел Бабаян қўл остига ўтгани борасида расмий хабар эълон қилинди.
Умумий қилиб айтганда, Лондон-2012 дан сўнг Олимпия термасини етти нафар мутахассис бошқарди. Рио-2016 учун Олимпия терма жамоаси бош мураббийи бўлганлар:
Алексей Eвстафеев - 2012-2013
Шуҳрат Мақсудов - 2014
Миржалол Қосимов - 2014
Бахтиёр Ашурматов - 2015
Виктор Жалилов - 2015
Дилшод Нуралиев - 2015
Самвел Бабаян - 2015
