Сўнгги пайтларда юз берган айрим воқеалар замонавий футболнинг энг ёрқин юлдузларидан бири бўлган Криштиану Роналду навбатдаги парвоз учун ўзига янги «орбита» танлаётганидан далолат бермоқда. Хўш, Мадриддан сўнг португалиялик тўпурар қайси мегаполисни обод қилиш ниятида? Қуйидаги мақола орқали сизга шу ҳақда маълумот берамиз.

Биринчи саҳна. Блан билан шивирлашув

Мазкур мулоқот «Реал»-«ПСЖ» учрашувидан сўнг юз берди: мезбонлар ҳужумчиси Криштиану Роналду Париж клуби бош мураббийи Лоран Блан қулоғига нимадир деб шивирлагани акс этган кадр бутун дунёга ёйилди. Испания­нинг марказий нашри - Marca мутахассисларининг тахминича, футболчи мураббийга қуйидагича мурожаат қилган: «Жамоангиз ажо­йиб ўйин кўрсатди. Сиз билан ҳамкорлик қилишга йўқ демасдим».

Португалиялик футболчининг «кузги касали» яна хуруж қила бошлагани ҳеч кимга сир эмас. Икки йил муқаддам у Мадридни тарк этиш тараддудига тушиб қолган. Манфаатли янги шартнома туфайли Мадридда қолишга розилик берганди. «Криштиану ўзи учун одатий бўлган сўл қанотда тўп сурмоқчи эди. Лекин ҳозир бошқа позицияда ўйнаётгани боис, футболдан завқ ололмаяпти. Самарадорликнинг пасайиб кетганидан хулоса чиқарадиган бўлсак, у мажбуран тўп сураётгандек», - деди «Қироллик клуби»нинг собиқ спорт директори Хорхе Вальдано.

«ПСЖ» билан бўлган қарама-қаршиликда ягона гол муаллифига

айланган ҳимоячи Начо Роналду хусусида шундай фикр билдирди: «Сиз жамоа тарихидаги энг яхши тўпурар ҳақида сўраяпсиз. Оғир дамларни бошидан кечираётган пайтда уни иложи борича қўллаб-қувватлаш керак. Иззатталаб Криштиану голсиз бахтли бўлолмайди». «ПСЖ» ҳимоячиси Тьяго Сильва ҳам ўз фикрини баён этди: «Агар раҳбарият уни Парижга таклиф этса, биз фақат мамнун бўламиз. Роналду жамоа­мизга тезда киришиб кетишига ишончим комил. Чунки у профессионал. Парижда фақат профессионаллар ўйнашади. Уни Бланга нималар деганидан бехабарман. Лекин ҳаммамиз Парижга ўтишидан умидвормиз».

Иккинчи саҳна. Ибранинг чиқиши

Айни шу кунларда Париж суперклубининг бош юлдузи Златан Ибрагимович қаторасига 10-марта Швециянинг энг яхши футболчиси сифатида эътироф этилди. Нуфузли совринни қабул қилиш тантанасида ҳужумчи трансфер миш-мишларидан бехабар эмаслигини шаъма қилиб ўтди: «Майдонда танҳо ҳукмронлик қилишни ёқтираман. Жамоа юксалиб боряпти, биз тобора яхши ўйнаяпмиз. Мақсадимиз - дунёнинг етакчи клублари сафида бўлиш. Жамоада фақат битта йўлбошчи бор. У - Златан Ибрагимович эканини ҳамма билади. Мен ташаббусни ўз қўлимда бўлишини истайман, фақат биринчи бўлиш учун яратилганман. Менинг табиатим доимо диққат марказда бўлишни тақозо этади. Мен шунақа одамман».

Қизиқ, бу швециялик ҳужумчининг португалиялик касбдошига йўллаган хуфёна мактубими ёки ўзининг тенгсиз экани ҳақидаги эслатма?

Криштиану Роналду ва Лоран Блан ўртасидаги хуфёна суҳбат испания­лик мухлис ва журналистлар оромини ўғирлади

Учинчи саҳна. Фильм тақдимоти

10 ноябрь куни Лондонда Криштиану Роналдунинг фаолиятига бағишланган ҳужжатли фильмнинг тақдимоти бўлиб ўтди. Тантанада оила аъзолари билан иштирок этган Роналду фахрий меҳмон сифатида таклиф этилган Жозе Моуриньо, «МЮ»нинг собиқ бош мураббийи Алекс Фергюсон ва италиялик Карло Анчелотти билан учрашди. Шунингдек, Криштианунинг собиқ жамоадошлари - Луи Саа ҳам таклиф этилганди. Ҳатто тантана қаҳрамонига умуман алоқаси бўлмаган Радамель Фалькао ҳам ҳозир бўлганди. Энг ажабланарлиси, тантанада «Реал»нинг бошқа бирор-бир вакили иштирок этмади. Тақдимот маросимини кириш қисми билан очган фильм продюсери Жеймс Гей-Рис асосан Роналдунинг ўз оила аъзоларидан бўлак яқин дўстлари йўқлигига эътибор қаратди: «Ўйлашимча, ақл бовар қилмас даражадаги юксак савияда тўп суриш кишидан бутун куч-маҳоратни фақат шу ишга бахшида этишни талаб қилади. Буни биз тўла-тўкис тасаввур қилолмаймиз. Роналду ўзидан ёрқин из қолдиришга аҳд қилган, уни футбол тарихидаги энг буюк намояндалар қаторида ёдга олишларини истайди. Шу боис, танҳо турмуш тарзини танлаган. Суперюлдуз мақомини сақлаб қолиш жуда мушкул».

Тадбир иштирокчиларидан яна бири - Роналдунинг агенти Жорже Мендеш мижози яқин вақтлар ичида Мадридни тарк этмаслигини таъкидлади: «Бу борада етарлича миш-мишларни тарқатиш мумкин. Улар ҳар куни «болаламоқда». Лекин менинг жавобим шуки, Криштиану ўзининг футболчилик фаолиятини «Реал»да якунлайди, унгача узоқ йил тўп суради».

Тўртинчи саҳна. Ронсеронинг «бомба»си

1-2 кунлик нисбий сокинликка Мадриднинг AS газетаси чек қўйди. Нашрнинг етакчи журналистларидан бири - «Реал»нинг ашаддий мухлиси Томас Ронсеро Роналду чиндан ҳам Мадридни тарк этиши, фақат Парижга эмас, Лонрдонга йўл олишини маълум қилганди. Унинг айтишича, португалиялик футболчига шахсан Роман Абрамович астойдил қизиқиб қолган. «Челси» соҳиби ЕЧЛ ғолиблигини соғинган ва жамоа бу мушкул вазифани фақат Криштиану Роналдунинг кўмаги билан уддалай олади, деб ҳисобламоқда. Россия­лик олигарх трансфер учун 100 млн. евро ажратишга тайёр. Қолаверса, у Эден Азар, Оскар ва Неманья Матичдан воз кечиш эвазига икки баравар кўпроқ маблағни шай қилиб қўйиши мумкин. Тўғри, Роналду билан Моуриньо ўртасидаги муносабат Мариддаёқ ўта кескин кўриниш олганди. Абрамович эса жорий мавсумдаги омадсизликка қарамай, «Бена-зир»га ишонч билдирмоқда. Лекин португалиялик мутахассис тақдимот маросимида ўз ватандошини самимий қутлаб, мириқиб суҳбатлашди. Афтидан, гина-кудуратлар бутунлай унутилган. Бундан ташқари, Криштиану яна Моу билан ҳамкорлик қилишга ҳеч қандай тўсиқ йўқлигини эътироф этди. Мендешнинг ташкилотчилик маҳоратига келсак, «Челси»да у юксак нуфузга эга. Диего Коста, Фалькао ва Луис Фелипенинг трансферига бош-қош бўлган мутахассис Роналдудек юлдузни Лондонга олиб келишда қийинчиликларга дуч келмаслиги аниқ. Абрамович эса келажакда Моуриньо ва Роналду ўртасида келишмовчиликлар юз бермаслиги учун «Беназир»дан барвақт воз кечиш варианти учун 40 млн. евро товон пулини ҳам тайёрлаб қўйган. У ҳолда Моу Парижга йўл олади. Бир ўзи Роналду билан биргаликда.