"Эл-класико"даги парокандаликдан кейин "Реал" аста-секин ўзига келмоқда. Бугун бўлиб ўтган Ла лиганинг 13-тури доирасида бўлиб ўтган "Эйбар"га қарши ўйинда мадридликлар тўлиқ устунликка эришмаган бўлсалар-да, маҳорат эвазига ғалабани қўлга киритишди.

Басклар "Қироллик клуби"га жиддий қаршилик кўрсатишга ҳаракат қилишди. Мезбонлар ҳужумда катта хавф туғдирмаган бўлсалар-да, тартибли ҳимояланишди. "Реал" иккита "стандарт"ни голга айлантира олишди. Биринчи бўлим сўнгида Модрич томонидан етказилган уўатмани Бэйл бош билан дарвозага бурди ва ҳисобни очди.

Иккинчи бўлим тугашига яқин эса ҳимоячи жарима майдончаси ичида Лукас Васкесни чалиб йиқитгани боис ҳакам пенальти белгилади. "Штатдаги пенальтичи" Роналду 11 метрли зарбадан унумли фойдаланди. 2:0.

Дарвоқе, Криштиану ўйин давомида икки марта яккама-якка вазиятдан фойдалана олмади. Унинг зарбаларидан бирини дарвозабон қайтарган бўлса, иккинчи вазиятда португалиялик футболчига аниқлик етишмади.

Ушбу ғалабадан кейин "Реал"нинг очколари 27тага етди ва улар 3-поғонада боришда давом этишади.

Ла лига, 13-тур
Эйбар – Реал Мадрид 0:2 (0:1, 0:1)
Голлар: 0:1 – 43 Бэйл, 0:2 – 82, пенальти Роналду.
Эйбар – Риесго, Жунка, Пантич, дос Сантос, Капа, Инуи, Дани Гарсия, Гонсалес (Верди, 70), Эскаланте, Берхон (Хайрович, 85), Энрик (Арруабаррена, 86).
Реал Мадрид – Навас, Данило, Карвахаль (Бензема, 85), Начо, Пепе, Модрич, Кроос, Хамес (Васкес, 65), Ковачич (Каземиро, 79), Бэйл, Роналду.
Огоҳлантиришлар: дос Сантос (31), Ковачич (37), Пепе (61), Бэйл (63), Васкес (77), Эскаланте (89), Верди (90).