Йозеф Блаттер ФИФАнинг фахрий президентлиги ўрнини эгалламоқчи. Бу ҳақда унинг маслаҳатчиси Клаус Штолькерга асосланиб, ТАСС нашри хабар берган.
"У ФИФАнинг фахрий президентлиги учун сайланишга уриниб кўради", деган Штолькер.
79 ёшли Блаттер 29 май куни ФИФА президентлигига бешинчи марта сайланган, 4 кун ўтиб ўз лавозимини муддатидан олдин тарк этиши ҳақида маълум қилганди.
Ноқонуний равишда пул ўтказмалари сабаб Блаттер ва Платини октябрь ойи бошида 90 кунга футболдаги фаолиятидан четлаштирилганди.
Ҳозирда унинг ўрнига ташкилотни Африка футбол конфедерацияси раҳбари Исса Ҳаяту бошқариб турибди. Президентлик сайлови 2016 йилнинг 26 февралида ўтказилади. Унда Блаттер ҳам, унинг ўринбосари сифатида қаралган Мишель Платини ҳам иштирок эта олмайди.
Қайд этиш керакки, бундан олдинги фахрий президент Жоао Авеланж 2013 йилнинг апрелида соғлиғидаги муаммолар туфайли лавозимини тарк этганди. У 1974 йилдан 1998 йилгача ФИФА президенти бўлган.
