6 декабрь куни “SuperMokh Cup 2015” турнири олдидан ташкилотчилар ва иштирокчи жамоалар вакиллари ўртасида йиғилиш бўлиб ўтди.

Унда турнир ташкилотчиларидан ташқари 40дан ортиқ жамоа вакиллари ҳам қатнашишди. Йиғилишдан кўзланган асосий мақсад иштирокчиларга мусобақа низомини тушунтириш, учрашувлар ўтказиладиган стадионларни таништириш, қолаверса жамоаларнинг қандай рангли либосларда ҳаракат қилиши борасида аниқ тўхтамга келиб олиш бўлди.

Шунингдек, жамоаларнинг мусобақада иштирок этиш учун топширган рўйхатларига асосан футболчиларнинг паспортлари ҳам кўздан кечирилиб, “заявка”га тўғри келадими ёки йўқми, деган саволга ҳам аниқлик киритилди.

Очиғини айтганда, мусобақа бошлангунга қадар олиб борилаётган ташкилотчилик ҳаммани лол қолдирмоқда. “SuperMokh Cup 2015” мусобақаси 7 декабрдан расман старт олади.

Эслатиб ўтамиз, турнирнинг 1-тур доирасида “Бунёдкор” футбол мактабининг 2002 йилда таваллуд топган футболчилари Филиппин U-13 терма жамоаси билан куч синашишади. 2003 йилда туғилган тарбияланувчиларимиз эса Жанубий Кореянинг “Пажу” жамоаси билан беллашишади. Ҳар иккала учрашув ҳам 7 декабрь куни маҳаллий вақт билан соат 12:10да (Тошкентда 09:10) бўлади.