Биласиз, “Олмалиқ” жамоаси ортда қолган мавсумда Олий Лигада 6-поғонани банд этди. Клубнинг мавсум давомида мухлисларга ёқадиган тарзда ўйин намойиш этишида ўзининг улкан хиссасини қўша олган футболчилардан бири – бу албатта Зоҳир Пиримов бўлди.
25 ёшли ярим ҳимоячи бир қатор муҳим учрашувларда кўрсатган ишончли ўйини орқали “Олмалиқ” ишқибозларининг олқишларига сазовор бўлди. Аммо Пиримовнинг “Олмалиқ” билан тузган амалдаги шартномаси якунига етиб бормоқда. Маҳоратли ярим ҳимоячининг келгуси фаолиятини қаерда давом эттириши эса кўплаб мухлисларни қизиқтираётгани тайин.
- “Олмалиқ” билан тузган шартномам декабр сўнггида ниҳоясига етади. Ҳали раҳбарият билан шартномани узайтириш борасида гаплашиб олмадик. Ҳозирча уйда дам оляпман. Яқинда жамоамиз янги мавсумга тайёргарликка киришади. Ўшанда клуб мутасаддилари билан келажагим борасида суҳбатлашиб оламиз. Агар “Олмалиқ”да қолишимни исташса, мен ҳеч қаерга кетмайман. Менга “Олмалиқ” жуда ёқади, - дейди Зоҳир Пиримов SPORTS.uz нашрига.
Таъкидлаб ўтамиз, Зоҳир Пиримов ортда қолган мавсумда Олий Лига доирасида 24 та учрашувда майдонга тушди ва икки бор рақиблар дарвозасини ишғол қилди.
