Максим Шацких Ўзбекистон миллий терма жамоаси ва Киевнинг “Динамо” клуби тарихида ўчмас из қолдирган футболчи ҳисобланади. Биз Супер Макснинг 9 та рекорди ҳақида тўхталиб ўтишни жоиз деб топдик.

1. Ўзбекистон терма жамоаси сафида энг кўп гол урган футболчи
Максим Ўзбекистон миллий терма жамоаси таркибида 60 та учрашувда майдонга тушиб ўз ҳисобига 34 та гол ёздириб қўйишга муваффақ бўлган. Ҳозирча Шацких бу борада мутлоқ рекордчи ҳисобланади.

2. Украина чемпионати тарихидаги энг сермаҳсул тўпурар
Шацких Украина чемпионатида 1999-2009 йилларда “Динамо” Киев таркибида 215 ўйинда – 97 гол, 2009-2014-йилларда “Арсенал” Киев либосида 90 ўйинда – 22 гол, 2012-2013-йилларда “Черноморец”да 6 ўйин, 2013-2015-йилларда “Говерла”да 34 ўйинда 6 гол урган. Супер Макс Украина чемпионатида умумий ҳисобда 345 та учрашувда майдонга тушиб, 125 та голга муаллифлик қилган.

3. Европа Чемпиолар лигасидаги энг сермаҳсул Осиёлик футболчи
Шацких “Динамо” Киев таркибида Чемпионлар лигасида 45 учрашувда 11 та гол урган. У “Байер”, “ПСВ”, “Андерлехт”, “Ньюкасл” (2 гол), “Ювентус”, “Арсенал”, “Локомотив”, “Рома” ва “Реал Мадрид” (2 гол) каби жамоалар дарвозасини ишғол қилган. Максим нуфузли турнирда энг кўп гол урган Осиёлик футболчи ҳисобланади.

4. Европа Чемпионлар лигасида энг кўп учрашув ўтказган Ўзбекистонлик футболчи
Чемпионлар лигасида 4 нафар Ўзбекистонлик футболчи тўп сурган. Улар орасида энг кўп майдонга тушгани Максим Шацкихдир. ‘Буратино” лақабли ҳужумчи турнирда 45 та ўйин ўтказган. Унинг энг яқин таъқибчиси Владимир Маминов ҳисобида 26 учрашув мавжуд.

5. Европа Чемпионлар лигасида энг кўп гол урган Ўзбекистонлик футболчи
Шацких Чемпионлар лигасида энг кўп гол урган Ўзбекистонлик футболчидир. Юқорида таъкидлаганимиздек унинг ҳисобида ЧЛда урилган 11 гол мавжуд.

6-7. Еврокубокларда энг кўп ўйнаган ва гол урган ўзбекистонлик футболчи
Шацких еврокубокларда жами 73 та учрашувда иштирок этиб, 23 марта рақиб посбонларини доғда қолдирган. Макс Ўзбекистонлик футболчилар орасида еврокубокларда энг кўп ўйин ўтказиш ва гол уриш борасида ҳам мутлоқ рекордчи ҳисобланади.

8. Ўзбекистон терма жамоасида “пента-трик” қайд этган ягона футболчи
2007-йили жаҳон чемпионати саралаш босқичи доирасида Ўзбекистон термаси ўз майдонида Хитой Тайпейини қабул қилди. Шацких 4, 16, 34, 57 ва 76 дақиқаларда рақиб посбонини ранжитиб “пента-трик” қайд этишга муваффақ бўлди. Терма жамоамиз таркибида бошқа ҳеч қайси футболчига бир ўйинда бешта гол уриш насиб этмаган.

9. Украина жамоаларида энг кўп гол урган легионер
Шацких Украина чемпионатида 15 йиллик фаолияти давомида ушбу юрт жамоалари либосида ўз ҳисобига 170 та гол ёздириб қўйишга эришган. Максим Украин клублари сафида энг кўп гол урган легионер номини ҳам ўзиники қилган!

Фурқат Юсупов