Хабарингиз бор, айни пайтда Самвел Бабаян бошчилигидаги Ўзбекистон олимпия терма жамоаси БААнинг Дубай шаҳрида ўзининг иккинчи йиғинини ўтказмоқда.

Мазкур йиғинда олимпиячиларимиз учта ўртоқлик учрашуви ўтказишни режалаштирганди. Бугунгача футболчиларимиз Сурияга кичик ҳисобда имкониятни бой беришди ва КХДРни йирик ҳисобда мағлуб этишди. Энди навбат Қатар олимпия терма жамоаси билан бўладиган ўртоқлик учрашувига. Мазкур матч бугун Ўзбекистон олимпия терма жамоасининг ушбу иккинчи йиғин доирасидаги сўнгги ўйини бўлади.

Таъкидлаб ўтамиз, олимпия терма жамоамиз келаётган йилнинг 12 – 30 январь кунлари Қатарда бўлиб ўтадиган Осиё чемпионатига тайёргарлик кўрмоқда. Турнирнинг гуруҳ босқичида Ўзбекистонга Ироқ, Жанубий Корея ҳамда Яман олимпия терма жамоалари рақиб бўлади.