«Барселона» клуби собиқ ярим ҳимоячиси, ҳозирда Қатарнинг «Ас-Садд» клуби шарафини ҳимоя қилаётган Хави жаҳоннинг энг яхши футболчиси ҳақида ўз фикрларини билдириб ўтди.

«Мен ҳеч қачон ўзимни "Олтин тўп"га муносиб деб ҳисобламаганман. Месси — футбол тарихидаги энг яхши футболчи ва у «Олтин тўп»ни олгани нормал ҳолат. Мен сўровномада ғолиб чиқишим кераклиги ҳақида ҳеч қачон ўйламаганман.

Футболда менинг бирорта ҳам душманим йўқ. «Барселона» ва Испания терма жамоасига боримни берганман ва бундан хурсандман.

Криштиану Роналду, Суарес ва Неймар – беназир футболчилар, лекин улар Месси билан савия борасида тенглаша олмайдилар.

Ҳозирда ҳужум қилиш ва финт ишлатиш қийин бўлиб қолган. Футболчилар жисмонан кучли бўлишган ва бўш ҳудуд кам қолмоқда. Месси рақиблардан ўтиб кетади ва ўзи учун шундай ҳудуд яратади. У голлар уради ва ҳар бир ўйинда натижага таъсир кўрсата олади.

У 10 йилдан бери чўққида. Ақлбовар қилмас барқарорлик», – дейди Хави.