"Барселона" жамоаси бош мураббийи Луис Энрике "Сельта"даги собиқ шогирди Нолитонинг ҳозирги жамоасига олиб келинишини истамоқда. Бу ҳақда Sport нашри хабар тарқатган.
Манбанинг ёзишича, "кўк-анорранглилар" устози "Вильярреал"дан Денис Суаресни харид қилиш ҳақидаги режага қаршилигини билдирган ва ундан кўра Нолитони трансфер қилиш талаби билан чиққан.
Охирги вақтларда матбуотда Нолитонинг қишки трансферлар вақтида каталониялар сафини тўлдириши ҳақида хабарлар пайдо бўлганди. Лекин, раҳбарият бу футболчини трансфер қилишга "Барселона"нинг молиявий бюджети йўл қўймаслигини таъкидлаб келмоқда.
"Сельта" ўзининг асосий футболчиси учун 18 млн евро талаб қилмоқда. "Барселона" президенти Хосеп Мария Бартомеу бунча миқдордаги маблағ сарфлаш ниятида эмаслигини айтган. Лекин, раҳбарият Нолитонинг ўрнига у учун талаб қилинган маблағнинг бир қисми ва бошқа бир футболчисини қўшиб бериш вариантини кўриб чиқаётгани айтилган.
Маълумот учун, 29 ёшли ярим ҳимоячи Нолито жорий мавсумнинг биринчи даврасида "Сельта" сафида 15та ўйин ўтказди ва 8та гол уриб, битта голли узатмани амалга оширди.