Бугун "Реал" жамоаси офисида раҳбарият шошилинч равишда мажлис ўтказди. Унда бош мураббий Рафаэль Бенитеснинг тақдири масаласи муҳокама қилинди.

Marca нашрининг хабар беришича, мажлис якунида Бенитес билан ҳамкорликни тўхтатиш бўйича қарор қабул қилинган. Унинг ишдан бўшатилгани ҳақида бугуннинг ўзида эълон қилиниши кутилмоқда.

Шунингдек, унинг ўрнини ким эгаллаши ҳам аниқ бўлган. Шу вақтгача "Реал"нинг ўринбосарлар жамоаси бўлмиш "Кастилья"ни бошқариб келаётган Зинедин Зидан Бенитеснинг ўрнини эгаллайди.

Маълумот учун, Рафаэль Бенитес 2015 йилнинг ёзида Карло Анчелотти ўрнига олиб келинганди. У "Реал" билан жорий мавсумнинг биринчи ярмида 18 турда 37 очко тўплади ва жамоа ҳозирда учинчи ўринда қолмоқда.

3 январь куни "Реал" "Валенсия" майдонидан дуранг билан қайтди. Қолаверса, чемпионатдаги асосий рақиблар билан учрашувларда қониқарсиз натижалар қайд этилди. "Барселона"га қарши "эл класико" баҳсида 0:4 ҳисобидаги мағлубият, "Атлетико" билан "Мадрид дербиси"да эса 1:1 ҳисобидаги дуранг қайд этилди.

Охирги вақтларда Испаниядаги нашрлар Бенитеснинг истеъфога чиқарилиши ҳақида кўп ёзишмоқда эди.