Юнусобод туманидаги «Гулистон» маҳалласида 7 январь куни ФИФА рефериси Равшан Эрматов, унинг отаси, собиқ футбол ҳаками Сайфиддин Эрматов ҳамда ФИФА ён қанот ҳаками Абдуҳамидулло Расулов билан учрашув бўлиб ўтди. Бу ҳақда Ўзбекистон Миллий университети доценти Шерзодхон Қудратхўжаев Facebook’даги саҳифасида маълум қилди.
«Саксон ва тўқсонни уриб қўйган маҳалла отахонлари Равшанни кўриб, ёшликларини, ўзлари кўчаларни чангитиб, тўп қувиб юрган завқли пайтларни мазза қилиб эслади. Мунис онахонлар ҳам Равшанни астойдил дуо қилди», — деб ёзади Шерзодхон Қудратхўжаев.
Қайд этишларича, учрашув чоғида йилнинг ҳар фаслида Равшан Эрматов, унинг отаси Сайфиддин Эрматов ва ён қанот ҳаками Абдуҳамидулло Расулов иштирокида болалар учун маҳорат машғулотлари ўтказилишига келишиб олинган.
Эслатиб ўтамиз, Равшан Эрматов 2015 йил 27 декабрь куни Globe Soccer Awards танловига кўра, «Йил ҳаками» деб эълон қилинди. 31 декабрь куни эса Ўзбекистон Президенти Ислом Каримов Эрматовни «Буюк хизматлари учун» ордени билан мукофотлаш тўғрисидаги фармонни имзолади.
