Жамоамизнинг бугунги машғулоти “Навбаҳор-Умид” футбол мактабидаги сунъий қопламали майдонида бўлиб ўтди.
Айни пайтда мураббийлар машғулотларни режа асосида олиб боришмоқда. Жамоа ихтиёрига етиб келган ярим ҳимоячи Обид Жўрабоев кеча якка тартибда шуғулланганди. Бугун эса Жўрабоев умумий гуруҳда шуғулланди. Мураббийлар штаби кўплаб футболчиларни кўздан кечиришда давом этишмоқда. Айнан шу сабабли, бугунги машғулотларда ҳам айрим футболчилар қатнашишди. Улар орасида мухлисларимизга таниш бўлган Дилшод Назировни эътироф этиш жоиз. Ўзларидан яхши таассурот қолдира олган ва “Навбаҳор”да ўйнашга лойиқ эканликларини амалда исботлай олган футболчиларгина янги мавсумда жамоа шарафини ҳимоя қилиш имконига эга бўлишади. Ишончни оқлай олмаганларга эса жавоб берилади. Жамоамизнинг Наманганда давом этаётган ушбу йиғини 15 январга қадар давом этади. Шундан сўнг футболчиларимиз мавсумга тайёргарлик кўриш мақсадида Тошкентга йўл олишади. Табиийки, пойтахт йиғинида назорат учрашувлари ҳам ташкил этилади.
