3 январдан бошлаб Қаршидаги қароргоҳида янги мавсумга ҳозирлик кўраётган “Насаф” футболчилари бугун соат 15:00да Ғузорнинг “Шўртан” жамоаси билан назорат учрашувида майдонга чиқади.

“Насаф”чилар Қаршида кунига икки маҳал машғулот ўтказишмоқда. Жамоадаги ўзгаришлар ҳақида тўхталадиган бўлсак, дарвозабон Ўткир Юсупов, ҳимоячи Алишер Юсупов, ярим ҳимоячи Акрам Баҳриддинов янги мавсумни бошқа жамоада бошлашади. Ўз навбатида ўтган мавсумда “Машъал” шарафини ҳимоя қилган дарвозабон Санжар Қувватов ва ҳужумчи Зоҳир Қўзибоев “Насаф” билан шартнома имзолашди. Ўтган мавсумда жамоа шарафини ҳимоя қилган етакчи футболчиларни деярли барчаси жамоа билан шартномаларини узайтиришди. Шунингдек, ўринбосарлар таркибида тўп тепган Акбар Муродов, Ислом Рашидхонов, Дилшод Хушбаков, “Насаф-2” ярим ҳимоячиси Нажмиддин Нормуродов асосий таркиб аъзолари билан машғулотларда иштирок этишмоқда. Куни кеча жамоа сардори Артур Геворкян қисқа таътилдан кейин жамоа таркибига келиб қўшилди.

Бугун “Марказий” стадион машғулотлар майдонида жамоамиз “Шўртан” билан қуч синашса, 17 январ куни Тошкентда Наманганнинг “Навбаҳор” жамоаси билан, 25 январ санасида эса яна битта назорат учрашувида майдонга чиқишади. Шундан сўнг қаршиликлар хорижий йиғинни ўтказиш мақсадиди Бирлашган Араб амирликларига йўл олишади.