Тожикистоннинг “Истиқлол” футбол клубининг расмий сайти “Насаф” жамоаси билан назорат учрашуви ўтказилиши тўғрисида хабар тарқатди.
“Ўзбекистон Кубоги-2015 соҳиби ва ОЧЛ-2016да иштирок этадиган Қаршининг “Насаф” клуби “Истиқлол” клубининг қишки ўқув-йиғин машғулотларидаги навбатдаги рақиби бўлади”,-дея хабар тарқатилмоқда клуб расмий сайтида.
Хабарга кўра, ушбу назорат учрашуви ҳақида 11 январ куни келишувга эришилган. Учрашув 25 январ куни “Бунёдкор” футбол академиясининг стадионида соат 15:00да бошланиши белгиланган.
Бундан ташқари “Истиқлол” клуби Тошкентда яна иккита назорат учрашувлари ўтказишга келишиб олган. Яъни, 19 январ куни “Олмалиқ”, 22 январ куни эса Фарғонанинг “Нефтчи” жамоалари билан.
Мухлисларга яна шуни эслатиб қўймоқчимизки, аввал Жиззахнинг “Сўғдиёна” ва Қаршининг “Насаф” жамоаларида фаолият юритган украиналик легионер ҳужумчи Олександр Каблаш айни пайтда “Истиқлол” жамоаси сафида ўйнамоқда.
