23 ёшгача бўлган футболчилар ўртасидаги Осиё чемпионати гуруҳ босқичи дастлабки тур ўйинлари доирасидаги Жанубий Корея ҳамда Ўзбекистон ўртасидаги ўйиндан сўнг, матбуот анжумани ташкил этилди.
Унда иштирок этган Ўзбекистон олимпия терма жамоаси бош мураббийи Самвел Бабаян, жамоа ёмон ўйин кўрсатмаган бўлсада, керакли натижа қўлга киритилмаганини айтиб ўтди.
"Яхши ўйин ўтказганимизга қарамай, ўйинда мағлуб бўлдик. Бу мусобақада ҳар бир ўйин жуда муҳим. Шунинг учун, Ироққа қарши кечадиган келаси ўйинда яхши ўйин намойиш қилиш билан бир қаторда, керакли натижани ҳам қайд этамиз, деб умид қиламан.
Козак ва Фомин учун марказий ҳимояда ўйнаш янгилик эмас. Улар бу амплуада аввал ҳам ўйнашган. Улар нега айнан ҳимоя марказидан жой олганига келсак, ҳимоядаги муаммоларимиздан бохабарсизлар. Турнирда саломатлиги сабаб иштирок этолмаётган футболчиларимиз ўрнини тўлдиришимиз лозим эди. Балки марказий ҳимоячилар баъзи хатоларга йўл қўйгандир, лекин умуман олганда уларга ҳеч қандай эътирозим йўқ.
Ҳужумда ишларимиз юришмади. Биз хатоларни ўрганиб чиқамиз. Кейинги ўйин мусобақадаги иштирокимизнинг давомий бўлиши эътиборидан жуда муҳим эканлигини яхши англаб турибмиз ва унда бугунги каби хатоларга йўл қўймасликка интиламиз", дейди Ўзбекистон олимпия терма жамоаси бош мураббийи Самвел Бабаян.
