Кеча Тошкент сари йўлга чиққан жамоамиз аъзолари пойтахт йиғинидан ўрин олган дастлабки кунги машғулотларни якунига етказишди.
Жамоамиз Тошкентдаги “Grand Atlas” меҳмонхонасида истиқомат қилишмоқда. Машғулотлар эса “Бунёдкор” клуби академиясига қарашли спорт иншоотларида олиб борилмоқда. Бугун футболчиларимиз эрталаб, тренажёр залида шуғулланишган бўлса кечки машғулотлар сунъий қопламали майдонда олиб борилди. Таркибдаги янгиликлар хусусида гап кетганида, кеча хабар берганимиздек жамоа сафига дарвозабон Акмал Ортиқов қўшилди. Умумий ҳисобда бугунги машғулотларда 19 нафар футболчи қатнашди.
Олдин айтиб ўтганимиздек, таркибни кучайтириш мақсадида бир қатор футболчилар билан музокараларга киришилганди. Эртадан машғулотларда янги футболчиларни қўшилишининг эҳтимоли юқори. Ана шундай ўйинчилардан бири сифатида Наманган футболи тарбияланувчиси, фаолиятини айнан “Навбаҳор”да бошлаган тажрибали ҳимоячи Хайрулла Каримовни эътироф этиш жоиз. Бугунги машғулотлар якунига етгач, Каримов жамоамиз истиқомат қилаётган меҳмонхонага келиб, клуб раҳбарлари билан учрашди.
