Мана ҳаш-паш дегунча 2016 йилнинг 15 куни ҳам ортда қолди. Жамоамизнинг Тошкентдаги йиғинни бошлаганига ҳам 12 кун бўлди. Айни дамда ўзбекистонлик футбол мухлисларининг эътибори Қатарда бўлиб ўтаётган 23 ёшгача бўлган футболчилар ўртасидаги Осиё чемпионатига қаратилган десак муболаға бўлмайди. Олимпиада йўлланмасини берадиган ушбу мусобақада Самвел Бабаян шогирдлари бугун иккинчи учрашувларини ўтказишади. Олимпиячиларимизга Ироққа қарши ўйинда омад тилаган ҳолда жамоамизга оид янгиликларни тақдим этамиз.
“Металлург”га қарши ўйиндан кейин футболчилар кеча эрталаб бир маҳал енгил машғулот ўтказишди. Бугундан эътиборан эса яна машғулотлар икки маҳал давом этади. Йиғин давомида мураббийлар штаби футболчиларнинг жисмоний ҳолатини тиклашга жиддий эътибор қаратишмоқда. Шунингдек, селекция ишлари жадал олиб борилмоқда.
Таркибда ҳозирча ўзгаришлар йўқ. Футболчиларимиз бугундан навбатдаги “Бухоро” билан бўладиган назорат учрашувига тайёргарлик кўришади. Ушбу учрашув 18 январь куни ўтказилишини эслатиб ўтмоқчимиз.
