Биласиз, кеча Ўзбекистон олимпия терма жамоаси Қатар яшил майдонларида бўлиб ўтаётган 23 ёшгача бўлган футболчилар ўртасидаги Осиё чемпионати 2-тур учрашувлари доирасида Ироқ термасига қарши баҳс юритди ва 2:3 ҳисобида имкониятни бой бериб қўйди.

Таъкидлаш жоиз, ушбу учрашувнинг илк дақиқасидаёқ терма жамоамиз аъзоси Достонбек Ҳамдамов ҳисобни очишга эришди. ОФК мутахассислари олиб борган кичик изланишдан сўнг мазкур голнинг учрашув старт олганидан 11.47 сония ўтгач рақиб дарвозаси тўридан жой олгани маълум бўлди. Натижада мазкур гол иккинчи бор ўтказилаётган U-23 Осиё чемпионатлари тарихидаги энг тезкор киритилган гол сифатида тарихга кирди.

Агар ОФК байроғи остида ўтказиладиган мусобақалар тарихига назар ташлайдиган бўлсак, бу гол қитъамиз миқёсидаги барча мусобақаларда урилган тезкор голлар учлигига ҳам кирди. Ёдингизда бўлса, ОЧЛ доирасида “Лаҳвия” ҳужумчиси Себастиян Сория “Пахтакор” дарвозасини 9.34 сониядаёқ ишғол этганди. Достонбек Ҳамдамовнинг Ироқ дарвозасига киритган голи эса бу борада иккинчи поғонадан жой олди. Кучли учликни БАА термаси аъзоси Али Мабхутнинг Австралиядаги ОЧ вақтида Баҳрайн термаси дарвозасига киритган голи банд этган. У ўшанда ўйиннинг 14 сониясидаёқ муваффақият қозонишга эришганди.