"Милан" клубининг собиқ футболчиси Юсуф Яффа ўз ёшни 9 йилга пасайтириб кўрсатганлиги гумон қилинмоқда. Бу ҳақда Mirror нашри хабар берган. У айни пайтда "Дуйсбург"нинг ўринбосарлари таркибида тўп сурмоқда.
Манбанинг хабарига кўра, у Италияга келганида 1996 йилнинг 31 декабрида туғилгани тўғрисидаги ҳужжатни (сохта паспорт) тақдим этган. Аслида эса у 1987 йилнинг 14 ноябрида туғилган. Яффа фейсбукдаги саҳифасида ҳам 1987 йилнинг 14 ноябри санасини кўрсатган.
"2013 йилда гамбиялик Яффа "Милан" билан шартнома имзолаган ва "россонери"нинг ўринбосарлар таркибига тўп суришни бошлаганди. Ўша пайтда йигитча ўзини 16 ёш қилиб танитганди", дейилади хабарда.
Ҳақиқатни унинг Гамбиядаги 28 ёшли синфдошлари "сотиб" қўйишган. Эндиликда, ушбу футболчи суд олдида жавоб беради. Судга 2013 йилда "Милан" ўринбосарлари мураббийи сифатида ишлаган Филиппо Инзаги ҳам чиқирилган. Суд 21 апрель куни ўтказилади.
Бундан олдинроқ, Нигерия термаси аъзоси Тарибо Уэста ёшини 12 йилга сурдиргани айтилганди. Лекин унинг айби исботланмаган.
