Каталониянинг «Барселона» клуби футболчиси Лионель Месси ва унинг отаси Хорхе Орасио Мессининг солиқларни тўламаганликда айбланаётган суд эшитуви 31 май куни бошланади ва 3 июнга қадар давом этади, дея хабар бермоқда Каталония Олий суди матбуот хизмати.

Лионель 2007, 2008 ва 2009 йилларда топган даромади учун солиқ тўламаган. Олдинроқ у Испания ғазнасига 10 млн евро тўлаган ва унга нисбатан жиноий иш очилмаслиги учун яна 15 млн евро тўлашга тайёрлигини маълум қилганди, бироқ маҳаллий ҳокимият бунга рад жавобини берганди.

Адлия идораларининг ҳисоб-китоб қилишича, Месси ва унинг менежери сифатида фаолият юритган отаси 4,1 млн евро миқдорида солиқ тўламаган. Уларнинг иккаласига ҳам мазкур қилмиши учун 22,5 ой муддатга озодликдан маҳрум этиш жазоси берилиши мумкин.