Биласиз, сўнгги пайтларда Ўзбекистон терма жамоаси асосий дарвозабонига айланиб олган Александр Лобанов “Пахтакор” билан хайрлашди ва Эроннинг “Персеполис” жамоаси аъзосига айланди.

Хўш, яқиндагина 30 ёшни қарши олган дарвозабон қай тариқа форс жамоасига кўчиб ўтди? “Персеполис” варианти қандай пайдо бўлди? Бу ҳақда тажрибали посбон билан боғланиб, суҳбатлашдик.

"Ростини айтадиган бўлсам, “Персеполис” варианти кутилмаганда пайдо бўлди. “Пахтакор” билан йиғинда эдим. Бир пайт Эрондан жиддий қизиқиш бўлаётганини айтиб қолишди. Бу клубнинг “Персеполис” эканини билганимдан сўнг эса иккиланиб ўтирмай Эронга боришга қарор қилдим.

Теҳронда мени жуда илиқ кутиб олишди. Сўнг клуб президенти билан суҳбатлашдим. Эртаси куни эса тиббий кўрикдан ўтдим. Барчаси муваффақиятли якунлангач 1,5 йилга мўлжалланган шартномага имзо чекдим. Шу ўринда алоҳида таъкидлашим жоизки, бу трансфер ҳеч қандай ижара эмас. Мени тўлалигича “Персеполис” аъзосига айландим", - дейди Лобанов.

Таъкидлаб ўтамиз, Александр Лобанов “Персеполис” таркибида машғулотларда ҳам иштирок эта бошлади.