Футзал бўйича Ўзбекистон миллий терма жамоаси февраль ойида Тошкентда бўлиб ўтадиган Осиё чемпионатига тайёргарликни давом эттирмоқда. Ўзбекистон терма жамоасига номзод бўлган "Ардус" футзалчиси Даврон Абдураҳмонов январдаги йиғинга чақирилмади. Аммо, футзалчи ўз устида ишлашдан тўхтагани йўқ.
- Январга қадар деярли барча йиғинларда иштирок этдингиз...
- Терма жамоанинг январь ойидаги йиғинига асосан Осиё чемпионатида ўйнайдиган футзалчилар чақирилди десам тўғрироқ бўлади. Афсуски, мен йиғинга чақирилмадим. Терма жамоага чақирилмадим деб уйда дам оладиган бўлсам Олий лига 4-турида формада бўлмаслигим мумкин. Шунинг учун ҳам югуриб ўз устимда ишлаяпман.
- Клубдан яна кимлар машғулот ўтказмоқда?
- Клубдан 3 нафар ўйинчи ҳар икки кунда югуряпмиз. Ўзим эса уйимга яқин стадионда ҳар куни югуряпман.
- Клуб мураббийи алоҳида кўрсатмалар берганми?
- Мураббийимиз алоҳида кўрсатма бериб кетган, ҳозир айнан мураббийнинг айтганлари асосида шуғулланаяпмиз.
- Терма жамоа йиғинига чақирилмаганингизни қандай қабул қилдингиз?
- Терма жамоага кимни чақиришни мураббий ҳал қилади. Мени йиғинга чақиришмаган экан демак ҳозирги ҳолатим терма жамоа талабига жавоб бермайди. Лекин, Осиё чемпионатида ватанимиз шаънини ҳимоя қилишни ва терма жамоага ёрдам беришни жуда ҳам истаган эдим.
