Василий Уткин, Алексей Андронов, Кирилл Дементьев, Александр Елагин, Владислав Батурин ва Эльвин Керимов каби шарҳловчилар «Матч ТВ» телеканалида штатдан чиқарилди. Бу ҳақда краснодарлик журналист Артур Каратай ўз твиттерида маълум қилган.

Энди бу шарҳловчилар телеканалда гонорар асосида ишлаши мумкинлиги айтилмоқда. Георгий Черданцев эса одатдаги тартибда ишлашда давом этади.

22 январь куни «Матч ТВ» раҳбарияти шарҳловчилар таркибида қисқартиришлар амалга ошириши ҳақида хабар берилганди. Унга кўра, бир қатор етакчи шарҳловчилар ишдан кетиши, улар қаторида Василий Уткин ҳамда Георгий Черданцев номлари ҳам борлиги айтилганди.

20 январь куни Василий Уткин «Матч ТВ» телеканалидан кетаётгани ҳақида маълум қилганди. У 2016 йилда Рио-де-Жанейрода ўтказиладиган олимпиадага бағишланган «Рио ждет» кўрсатувидаги иштирокини тўхтатгани, ишдан кетишига ЕЧЛнинг гуруҳ босқичи доирасидаги «Байер» ва «Барселона» баҳси вақтида ухлаб қолгани сабаблиги ҳақида айтганди.

ВГТРК ва «НТВ-Плюс» базасида ташкил этилган «Матч ТВ» 2015 йилнинг 1 ноябрида намойишларни бошлаганди. Каналнинг бош продюсери Тина Канделаки ҳисобланади.