Футзал бўйича Ўзбекистон миллий терма жамоаси кеча Осиё чемпионатидан олдинги сўнгги йиғинни бошлади.
Терма жамоа мураббийлар штабида хорижлик мутахассислар иш бошлашди. Энди қитъа биринчилиги якунига қадар испаниялик Аркаит Сисниега Гомес фитнесс мураббий, бразилиялик Анҳолето Александре эса физиотерапевт сифатида иш олиб боради.
Аркаит Сисниега Гомес 2013 йилда Испаниянинг “Дебабрена” клубида фитнесс мураббий сифатида иш олиб борган, 2014 йилда эса “Кустом” клубида биомеханика бўйича мутахассис сифатида фаолият юритган.
Анҳолето Александре 2013-2015 йилларда қадар “Ногоая Оушенс” футзал клубида, 2015 йил эса “Чонбури” футзал клубида физиотерапевт лавозимида ишлаган.
Ҳар икки мутахассис билан Осиё чемпионати якунига қадар шартнома тузилган, агар Ўзбекистон терма жамоаси Колумбияда ўтадиган Жаҳон чемпионатига йўлланмани қўлга киритса, улар билан тузилган шартнома муддати узайтирилади.
Эслатиб ўтамиз, Ўзбекистон терма жамоаси Осиё чемпионатида Ливан, Қирғизистон ва Саудия Арабистони терма жамоалари билан бирга "A" гуруҳида кураш олиб боради.
