Бугун Осиёнинг беш карра энг яхши рефериси Равшан Эрматов Қатар пойтахти Доҳа шаҳрига жўнаб кетди. Ҳамюртимиз Қатарда давом этаётган Осиё чемпионати доирасида ташкил этиладиган Осиё футбол конфедерациясининг махсус тадбирида иштирок этади.
Эрматов ушбу маросимга фахрий меҳмон сифатида таклиф этилган. Тадбирда шахсан Осиё футбол конфедерацияси президенти, бош котиб ва бошқа бир гуруҳ расмий шахслар иштирок этади.
Яна бир маълумот, ўтган йили дунёнинг энг яхши ҳаками деб топилган ҳамюртимиз 9 февраль куни бўлиб ўтадиган Осиё чемпионлар лигасининг плей-офф босқичидан ўрин олган ўйинни бошқаради. Эрматов ва унинг бригадаси Бирлашган Араб Амирликларининг “Ал Жазира” ҳамда Қатарнинг “Ал Садд” жамоалари ўртасидаги учрашувда ҳакамлик қилади.
Равшан Эрматовга қанотларда Абдулҳамидулло Расулов ва Жаҳонгир Саидовлар ёрдам беришади. Захирадаги ҳакам Шерзод Қосимов. Ушбу жуфтлик ғолиби Осиё чемпионлар лигасининг гуруҳ босқичида “Пахтакор” жамоаси билан бирга “C” гуруҳидан ўрин олади.
