Хабарингиз бор, Ўзбекистон терма жамоаси ярим ҳимоячиси Санжар Турсунов куни кеча ўз жамоасини ўзгартирди. Ҳамюртимиз Украинанинг “Ворскла” жамоасини тарк этиб, Қатарнинг “Умм Салал” клубига бориб қўшилди.
Украин жамоаси расмий сайтининг ёзишича, Турсунов янги клубидаги илк голини полтавалик дўстларига бағишлайди.
- Ортда қолган вақт давомида “Ворскла”да ажойиб дамларни бошдан кечирдим. Полтаванинг анъаналари-ю одамларига мехрим тушиб қолганди. “Ворскла”даги жамоадошларим билан бир қанча ажойиб лаҳзаларни бирга ўтказдик. Ушбу клубнинг бир қисмига айлана олганимдан жуда бахтлиман. Бунинг учун жамоадагилардан ва унинг ажойиб мухлисларидан миннатдорман. Бундан кейин ҳам “Ворскла”нинг натижаларини ва ўйинларини интернет орқаали имкон қадар кузатиб боришга интиламан. Ўзимнинг “Умм Салал” таркибидаги илк голимни айнан полтавалик дўстларимга бағишлайман, - дейди маҳоратли футболчи.
Таъкидлаб ўтамиз, Санжар Турсуновнинг жамоаси бугун Қатар Юлдузлар Лигаси 16-тур учрашувлари доирасида мусобақа жадвали карвонбошиси “Ал Райян”га қарши баҳс юритади. Ҳамюртимиз мазкур матчда катта эҳтимол билан янги клуби таркибида дебют қилади.
