Хабарингиз бор, бугундан Фарғонада “Ҳоким кубоги-2016” мусобақаси бошланди.

1-тур доирасида “Андижон” ҳамда “Ёзёвон Лочинлари” жамоалари ўзаро баҳс олиб боришди ва унда тажрибалироқ бўлган андижонликлар зафар қучишди - 3:1. Биз эса “Ёзёвон Лочинлари” жамоаси бош мураббийи Исломбек Исмоиловнинг мазкур учрашув борасидаги фикрлари билан қизиқдик.

- Барчамизга маълум, "Андижон" кучли жамоалардан хисобланади. Биз бугун улар билан тенгма-тенг ўйин кўрсатишга ҳаракат қилдик. Майдоннинг ҳар бир қаричида жиддий кураш олиб борилди. Хатто, биринчи бўлимда ҳисобда олдинда бораётган ҳам эдик. Лекин иккинчи бўлимда "Андижон" биздан бир бошга устун эканини намойиш эта олди ва бизни мағлубиятга учратди. Мен жамоани декабрдаги йиғинида қатнашган эдим. Бир ой жамоа билан бирга бўлолмадим. Балки шу ҳам мағлубиятга сабаб бўлгандир. Энди бугунги ўйиндан хулоса чиқариб кейинги учрашувларда мухлисларимизни хушнуд этишга ҳаракат қиламиз, - дейди тажрибали мутахассис.