Ўтган мавсумнинг иккинчи қисмини Қозоғистоннинг “Жетису” клуби сафида ўтказган ўзбекистонлик ярим ҳимоячи Бобир Давлатов яна бир қозоқ клуби – “Актобе” йиғинида қатнашаётгани ҳақида хабар берган эдик.
Мазкур жамоа 10-30 январ кунлари Туркияда йиғин ўтказганди. Шундан сўнг жамоа аъзоларига ва кўрикда бўлган футболчиларга қисқа муддатли таътил берилганди. Бугундан “Актобе” янги йиғинга киришди. Бу сафар ҳам йиғин ўтказиш жойи сифатида Туркия танланган. Актобеликлар у ерда 25 февралга қадар машғулотлар олиб боришади.
Трансфер ҳуқуқи аслида Россиянинг “Рубин” жамоасига тегишли бўлган 19 ёшли ўзбекистонлик ёш ярим ҳимоячи ҳам “Актобе” билан мазкур йиғинга йўл олди. Ҳамюртимиз қозоқ клубининг бу галги йиғинида ҳам иштирок этади. У катта эҳтимол билан янги мавсумни “Актобе”да ўтказади.
