Биласиз, 10-21 февраль кунлари пойтахтимизда футзал бўйича Осиё чемпионати бўлиб ўтади.

Унда иштирок этадиган Хосе Мария Мендез бошчилигидаги Ўзбекистон терма жамоаси олдига Жаҳон чемпионатига йўл олиш вазифаси қўйилган. Терма жамоамиз етакчиси Артур Юнусов мусобақа олдидан SPORTS.uz интернет-портали учун махсус интервью берди.

- Осиё чемпионатига олиб борилган тайёргарлик жараёни қандай кечди?

- Қитъа чемпионатига жуда яхши ҳозирлик кўрдик. Ташкил этилган йиғинлар ва синов-назорат баҳслари кўнгилдагидек ўтди. Ана энди мусобақа старт олгач, қилган барча меҳнатимиз самараси кўринади. Умид қиламанки, терма жамоамиз ўз олдига қўйилган вазифани уддалай олади.

- Бош жамоамиздан Жаҳон чемпионатига йўлланмани қўлга киритиш талаб этилади. Қийин бўлмасмикан?

- Осон бўлмаслиги аниқ, аммо ҳар қандай вазифани ҳам бажариш мумкин. Тўғри, Осиё чемпионатига барча терма жамоалар яхши тайёргарлик ва кучли таркиб билан ташриф буюришади. Лекин биз ҳам шуни инобатга олган ҳолда мусобақага тайёрландик. Жамоамизда маҳоратли ўйинчилар етарли. Менимча, Жаҳон чемпионати йўлланмасини қўлга кирита оламиз.

- Мусобақанинг Тошкентда ўтиши ҳам қўл келса керак. Нима дедингиз?

- Албатта, агар кўпсонли мухлислар ўйингоҳга келиб, терма жамоамизни қўллаб туришса, биз ҳам бор куч-ғайратимизни ишга соламиз. Ишқибозларнинг қўллаб-қувватлаши футзалчилардаги руҳиятни янада оширади. Шу сабабли ҳам ўйинларимизга кўплаб мухлисларнинг келишини кутяпмиз. Насиб этса, ўз ишқибозларимиз қаршисида яхши ўйин намойиш этиб, Жаҳон чемпионатига чиқишни ният қилганмиз.