7 февраль куни “Ҳоким кубоги-2016”нинг финал ўйини бўлиб ўтди. Ҳал қилувчи ўйинга мусобақа мезбони “Нефтчи” ҳамда Навоийнинг “Қизиқлум” жамоалари йўл олишган эди.
Учрашувдан аввал “Нефтчи” СК стадионига келган мухлислар учун фарғоналик санъаткорлар томонидан концерт дастури ташкил этилди. Раққосалар, хонандалар ва бир қатор таниқли сўз усталарининг чиқишлари ўйингоҳга келган мухлисларга яхши кайфият бағш этди.
Соат 15:00да финал ўйини бошланди. Айтиш керакки, Андрей Фёдоров ва Хамид Актамов илк дақиқалардан бошлаб майдонга жанговор таркибларни туширишди. Аммо кескин курашларга бой бўлган баҳснинг илк тайми нурсиз дуранг билан якунланди. Кутилганидек, иккинчи бўлимда “Нефтчи” ва “Қизилқум” жамоалари ўйинни кучайтиришди.
Таъкидлаш жоизки, иккинчи таймда захирадан курашга қўшилган футболчилар учрашувга “янги қон” олиб киришди. Иккинчи бўлимнинг ўрталарига келиб, “Нефтчи” футболчиси тепган тўп рақиб вакилининг қўлига тегди деб ҳисоблаган ҳакам пенальти белгилади. Айни шу дақиқалардан тортишувли вазият юзага келди. Ҳакамнинг қароридан норози бўлган навоийликлар ўйинни якунламасдан бирин-кетин майдонни тарк этишни бошлашди.
Бироқ кўп ўтмай вазият ижобий томонга ўзгартирди. Хамид Актамов шогирдлари бироз ўтиб яна майдонга қайтишди ва ўйинни давом эттиришди. “Қизилқум” дарвозасига белгиланган пенальтини эса Шукур Пўлатов аниқ амалга ошириб ҳисобни очди ва бу гол якунда “Нефтчи”нинг ғалабасини таъминлади. 1:0, “Нефтчи” ғалабаси.
“Ҳоким кубоги-2016”. Финал.
“Нефтчи” – “Қизилқум” 1:0 (0:0)
Гол: Шукурали Пўлатов.
“Нефтчи”: Абдумавлон Абдужалилов, Шукур Пўлатов, Жаҳонгир Меҳмонов, Дилёр Ирматов, Илхом Бойдедаев, Жавоҳир Расулов, Умид Қодиров, Алишер Саматов, Сардор Эминов, Дамир Назинов, Мурод Бобожонов.
Захира: Сергей Смородин, Сардор Қулматов, Достон Турсунов, Мухсин Убайдуллаев, Шерзод Ҳакимов, Отабек Исроилов, Хусниддин Ғофуров.
“Қизилқум”: Эркин Жабборов, Гиорги Квесмешвили, Акмал Рустамов, Вечеслав Шевченко, Бахриддин Ваҳобов, Алишер Юсупов, Шерали Жўраев, Самандар Шодмонов, Азизбек Усмонов, Илхом Юнусов, Андрей Деркач.
“Нефтчи” ПФК матбуот хизмати.
