“Бунёдкор” – “Ал-Шабаб” (2:0) учрашувидан кейинги матбуот анжуманининг иккинчи қисмида “қалдирғочлар” устози иштирок этди.

- Аввало, ғалаба билан мухлисларимизни табриклаб ўтмоқчиман. Ноқулай об-ҳаво ҳароратига қарамасдан улар стадионга келишди ва бизга далда бериб туришди. Кейинги учрашувларимизни ҳам мана шундай ғалабалар билан якунлаб, ишқибозларга хурсандчилик улашишни истаймиз. Ўйинга тузган режамиз тўлиқ иш берди. Аввалдан ўйланган услуб, ғалабамиз омили бўлди. Йиғинлар мобайнида турли хил ўйин услубларини синаб олганмиз. Насимов ва Нурматов ҳужумда ҳам, ҳимояда ҳам яхши ўйин кўрсатишди. Бу каби муҳим ўйинларда, айниқса ҳисоб 2:0 бўлган паллаларда олдинга ўтиб кетиб, орқа чизиқни унутиб қўйиш керак эмас. Йигитларимиз рақибни зарба берадиган вазиятга чиқармасликлари керак эди ва буни жуда яхши уддаладилар. Ҳимоячиларимиз жуда ёш йигитлардан ташкил топган. Йилдан-йилга улар янада ўсади ва кучайиб боришади. Чемпионлар лигасида шунчаки иштирок этишдан наф йўқ. Бизнинг мақсадимиз – бош совринни қўлга киритиш. Биз ҳаракат қиламиз, аммо буни қанчалик уддалаймиз – вақт кўрсатади. Ўтган йили бизга омад етишмаганди. Умид қиламанки, бу йил яхши натижалар қайд этамиз, - дейди Сергей Иванович.