Россиянинг «Уфа» жамоасида тўп суриб келаётган ўзбекистонлик ярим ҳимоячи Вагиз Галиулин клуб билан келишган ҳолда шартномасини бекор қилди. Бу ҳақда уфаликлар расмий сайтида хабар берилган.

«Уфа» клуби ўтган вақт давомидаги ҳамкорлик учун Вагизга миннатдорчилик билдирган ва футболчига келгуси фаолиятида омад ёр бўлишини тилаган.

Маълум қилинишича, 28 ёшли футболчи ўз фаолиятини Россиянинг иккинчи лигасидаги «Тосно» жамоасида давом эттиради. Жорий мавсумда ярим ҳимоячи Россия чемпионатида 11та, Кубок баҳсларида эса 2та ўйинда майдонга тушган.

Маълумот учун, «Тосно» профессионал футбол клуби Ленинград вилоятининг Тосно шаҳрида жойлашган бўлиб, 2013 йилда ташкил топган.

Галиулин футболчилик фаолиятини 2002 йилда «Андижон» жамоасида бошлаганди. У 2008 йилда Россия чемпионатида, «Рубин» жамоасидаги иштироки орқали дебют қилганди. Кейинроқ у «Сибир» ва «Нефтхимик» жамоаларида ҳам ўйнади. У Ўзбекистон миллий терма жамоаси сафида 12та ўйин ўтказган.