Ҳозиргина “Ўзбекистон” спорт мажмуасида Эрон ҳамда Вьетнам терма жамоалари ўртасида ярим финал учрашуви якунланди. Эронликларнинг голлар “ёмғири” остида ўтаган ўйин 13:1 ҳисобида якунланди.
Ўйиндан сўнг ҳар икки терма жамоа устозлари иштирокида матбуот анжумани ташкил этилди. Унда Эрон терма жамоаси бош мураббийи Мухаммад Нозим қуйидагиларни таъкидлади:
- Энг аввало бизни ўйин давомида қўллаб-қувватлаб турган барчага миннатдорчилик билдираман. Олдин таъкидлаганимдек, биз чиройли ўйин кўрсатишни ваъда қилгандик. Мана сўзимизнинг устидан чиқдик. Ўйиндан-ўйинга кучайиб бораётганимиздан жуда ҳам хурсандман.
Таркибни тузаётганда ҳам ёш, ҳам тажрибалио футзалчилардан жамоа шакллантиришга интилдик. Бунда айниқса, Бразилиядаги турнир ас қотди. Осиё чемпионатига яхши шаклланган таркиб билан кела олдик.
Мусобақа давомида бошқа терма жамоалар ўйинини ҳам кузатиб бордик. Тан олиш лозим, Ўзбекистон терма жамоаси ҳам финалга ҳақли равишда йўл олди. Бизни олдиндан қизиқарли ўйин кутмоқда. Мусобақа олдидан финалда айнан Ўзбекистон билан ўйнашимизни таҳмин қилгандим. Амалда шундай бўлиб ҳам чиқди. Ишончим комил, бу финал – энг чиройли финал баҳси бўлади, - дейди тажрибали мураббий.
