“Ал Аҳли” – “Насаф” жамоалари учрашувидан олдинги ўтказилган матбуот анжуманида дастлаб “Насаф” бош мураббийи Рўзиқул БЕРДИЕВ ва жамоа сардори Артуг ГЕВОРКЯН иштирок этишди.

-Эртанги ўйин биз учун осон кечмайди, -дея сўз бошлади Рўзиқул Саъдуллаевич. –

Чунки рақибимиз кучли ва тажрибали жамоа. Таркиби ҳам маҳоратли футболчилардан иборат. “Ал Аҳли” билан ўтган йили ҳам куч синашганмиз ва жамоанинг имкониятлари бизга яхши маълум. Қолаверса, жиддаликлар тажрибали мураббийга ҳам эга. Ўтган йили “Ал Аҳли”ни камида ярим финалга боришини кутгандим. Афсуски, улар 1/8 финалдаёқ мусобақа билан хайрлашишди. Ўтган йили Жиддада мағлуб бўлдик, Қаршида дуранг қайд этдик. Қаршидаги баҳсда яхши ўйин кўрсатсакда, ғалабага эриша олмагандик.

-Гуруҳ ҳақида фикрингиз? Қайси жамоаларни кейинги босқичга чиқиш имконияти юқори, деб баҳолайсиз?

-Фикримча, бизнинг гуруҳ ОЧЛдаги энг кучли гуруҳлардан бири. Ҳар бир клуб ўз мамлакатининг етакчи жамоаси ҳисобланади. Албатта биз ҳам ижобий натижа учун ҳаракат қиламиз. Бунинг учун ақлли ва тартибли ҳаракат қилишимиз лозим. Ушанда яхши натижага эришиш мумкин. Кейинги босқичга чиқишда ҳамма жамоанинг имконияти тенг. Буни ўтказиладиган ўйинлар кўрсатиб беради.

Артур Геворкян: -Эртанги ўйинга муносиб ҳозирлик кўрдик. Рақибимиз ўта жиддий. Дастлабки ўйиндаги ғалаба ҳар икки томон учун ҳам муҳим. Шу боис сафардан фақат ижобий натижа билан қайтиш илинжида тўп тепамиз.