Италия терма жамоаси бош мураббийи Антонио Конте Евро-2016 мусобақаси якунига етгач, Англиянинг «Челси» клуби бошқарувини қўлга олади. Бу ҳақда Goal.com Италиянинг La Gazzetta dello Sport нашрига таяниб хабар тарқатди.
Манбага кўра, 46 ёшли мутахассис «Челси» раҳбарияти билан оғзаки келишувга эришган. Ҳозирча шартноманинг муддати ва молиявий тарафлари маълум қилинмаган.
Конте шартномаси мавсум якунига қадар тузилган Гуус Хиддинкнинг ўрнини эгаллайди.
Эслатиб ўтамиз, олдинроқ лондонликларни Массимилиано Аллегри ёки Диего Симеоне бошқариши мумкинлиги ҳақида хабарлар тарқалганди.
