Ўзбекистон ёшлар (U19) терма жамоаси шу кунларда Хитойда ўтказилаётган халқаро мусобақада иштирок этмоқда.

Кеча турнирда 2-тур ўйинлари бўлиб ўтди. Ўзбекистонлик ёшлар Хитойга қарши баҳс олиб бориб, 3:1 ҳисобида ғалаба қозонишди. Жасур Абдураимов шогирдлари илк дақиқалардан ўйин назоратини ўз қўлига олишди ва дастлабки 30 дақиқа давомида 3та гол уришга муваффақ бўлишди. 39-дақиқада эса мезбон футболчиси пенальтидан битта жавоб тўпини киритди.

Хитой ёшлар терма жамоаси бош мураббийи Ли Мин ўйин борасида қуйидагича фикр билдириб ўтди: "Ўзбекистонга қарши ўйин жуда юқори темпда ўтди. Бундай ўйинлар жамоанинг маҳоратини оширади".

Терма жамоамиз дастлабки турда Хорватия билан 1:1 ҳисобида дурангга имзо чекканди. Жамоамиз эртага Филиппинга қарши сўнгги тур учрашувини ўтказади. Хорватлар кеча Филиппин дарвозасига жавобсиз 9та гол урди.

Ҳозирча Ўзбекистон ва Хорватия терма жамоалари ҳисобида 4тадан, Хитойда эса 3 очко бор.