Халқаро футбол федерациялари ассоциациясининг (ФИФА) 2015 йилдаги бюджети дефицити 108 миллион долларни ташкил қилди. Бу ҳақда Reuters ташкилотнинг аудит масалалари бўйича вакили берган маълумотга таяниб хабар тарқатди.
Унинг сўзларига кўра, бундай катта миқдордаги дефицитга порахўрлик билан боғлиқ жиноий можаролардан кейин ФИФАга бўлган ишончнинг йўқолгани сабаб бўлган.
Эслатиб ўтамиз, коррупцион можароларда иштирок этганликда айбланган ФИФА президенти Йозеф Блаттер, УЕФА президенти Мишель Платини ва яна бир қатор ФИФА мансабдорлари узоқ муддатга футболдан четлатилишган.
Бугун, 26 февраль куни Цюрихда ФИФАнинг янги президентни аниқлаш учун сайловлар бўлиб ўтади. Унда ОФК президенти шайх Салмон бин Иброҳим Ал-Халифа, УЕФА Бош котиби Жанни Инфантино, Иордания шаҳзодаси Али бин Ал-Хусайн, жанубий африкалик Токио Сексвале ва ФИФА собиқ Бош котиби Жером Шампань номзод сифатида иштирок этишмоқда.
