Бу ҳафта футбол учрашувларига бой бўлди. Унда клубларимиз ОЧЛда ўз иштирокларини бошлашган бўлса, ЕЧЛ ва ЕЛда ҳам беллашувлар давом эттирилди. Қизиқ томони бизнинг жамоаларимиз биринчи турда Саудия Арабистони клубларига қарши баҳсларда майдонга тушишди. “Локомотив” ва “Пахтакор” ўз уйида чемпионатни бошлади. “Бунёдкор”, “Насаф” эса сафарда дастлабки ўйинларини ўтказишди. Мазкур қарама-қаршиликларда биз жами 3 очко ишлаб олдик холос. Ютса бўладиган беллашувларда вакилларимиз очколарни бой беришгани дилни бироз хира қилди. Лекин бизда ҳали мавсум бошланмагани учун бу натижаларни пашшадан фил ясашга шошилмаганимиз яхши. Яъни, клубларимизнинг биринчи ўйинларини ўртача баҳоласак бўлади.     Энг қизиғи “Насаф” таркибида Бобур Абдуҳолиқов ОЧЛ ўзининг дебют ўйинини ўтказиб гол уришга ҳам эришди. Бу ҳужумчи яқинда 19 ёшга тўлади. Рўзиқул Бердиев бу ёш футболчини қўрқмасдан ўйинларда асосий таркибга киритмоқда. У Ўзбекистон супер кубоги ва ОЧЛ учрашувларида майдонга бошланғич таркибда тушди. Суперкубок беллашувида Бобур Абдуҳолиқов гол урмаган бўлсада, ОЧЛда ўзининг дастлабки ўйинидаёқ муваффақият қозонди. Шу куни ҳужумчи яна гол урса бўладиган вазиятлардан фойдалана олмади. Акс ҳолда “Насаф” сафардан камида дуранг билан қайтиши мумкин эди. Лекин асосийси Бобир Абдуҳолиқов ўзини йўқотиб қўймади. Унинг голи ҳозирча қандайдир аҳамият касб этмагандир. Бироқ охирги турда ўзаро ўйиндаги киритилган голлар сарҳисобида ас қотиб қолиши мумкин.   
Достонбек Ҳамдамов ОЧЛ энг яхши ўйинини ўтказди десак, адашмаган бўламиз. “Бунёдкор” футболчиси “Ал Наср”га қарши учрашувда 2 голга муаллифлик қилди. У ажойиб ўйини билан рақибга ҳақиқий бош оғриғи бўлди. Жумладан тезкор киритилган гол мезбонларни анча ҳавотирга солиб қўйди. Лекин унинг голлари якунда ғалабага етарли бўлмади. Бироқ Достонбек Ҳамдамов ОЧЛда ўзининг дастлабки дублини нишонлади ва ўйиннинг энг яхши футболчиси бўлди.      Ишлари юришмаётган “Манчестер Юнайтед” кечаги ўйини орқали мухлисларига бироз бзлсада тасалли бергандек бўлди. Манкунианликлар Европа Лигасидан ўрин олган “Мидтюлланн”га қарши биринчи беллашувдан сўнг ҳамма уларни бу мусобақадан “бадарға” қилганди. Лекин Англиядаги жавоб баҳсида “қизил иблислар” ажойиб ўйин намойиш этиш билан бирга мухлисларни бироз хушнуд этишди. Луи ван Гал учрашувдан олдин жароҳат орттириб олган Марсиал ўрнига ёш Маркус Рэшфордни асосий таркибда майдонга туширди. Ўз навбатида 18 ёшли ҳужумчи дублга эришди ва мураббий ишончини оқлади. Қолаверса, унинг ҳаракатлари ҳам ишқибозлар учун янгилик бўлди.  

    Шунингдек ҳужумчи “қизил иблислар”да биргина ўйини орқали рекорд ўрнатишга ҳам эришди. У “МЮ” таркибида Еврокубокларда гол киритган энг ёш футболчи бўлди. Маркус Рэшфорд 18 ёш-у 117 кунлигида гол урган бўлса, Жоржа Беста 1964 йили 18 ёш-у 158 кунлигида муваффақиятга эришган.     Бекзод ИСАЕВ