“Ал-Иттиход” – “Локомотив” ўйинидан кейин ташкил этилган матбуот анжуманига биринчи бўлиб Андрей Микляев кириб келди.
“Бугун ажойиб футбол гувоҳига айландик. Гуруҳ етакчисига қарши ўйнадик десам, хато бўлмас. “Ал-Иттиход” ўз анъаналарига содиқ қолгани ҳолда ҳақиқий жанг қилди. Биз ҳам майдонда қандай кучга эга эканимизни кўрсата олдик”, – дея гап бошлади “Локомотив” мураббийи.
“Бугун шундай ўйин бўлдики, унда ҳар икки жамоа ҳам ғолиб чиқиши мумкин эди. Бироқ беллашув дуранг билан якун топди. Гарчи ғалаба қозона олмаган бўлсак-да, бугунги ўйин учун йигитларга рахмат айтаман”.
Маҳаллий журналистлар томонидан “Ал-Иттиход”нинг нима учун очко йўқотгани ҳақидаги саволга Микляев қуйидагича жавоб берди:
“Рақибимиз уч кун аввал ўз чемпионатида қийин ўйин ўтказганди. Бу уларга кучни тежаш борасида муаммолар келтириб чиқарган бўлиши керак. “Иттиход” гол уриб олганидан кейин ҳисобни сақлаб қолиш илинжида тўп сурди. Биз эса гол уришга ҳаракат қилдик”.