Дортмунднинг "Боруссия" клуби арманистонлик форварди Генрих Мхитарян немис жамоаси билан совринларга эга чиқишни истамоқда.
5 март куни Германия чемпионати 25-турида "Бавария"га (05.03) қарши бўладиган учрашувдан олдин берган интервьюсида футболчи бу ҳақда тўхталиб ўтган.
– Битта соврин барибир битта соврин. Футболчи сифатида мавсум сўнггида қайси мусобақа бўлишидан қатъий назар ғолиб чиқишни истайман. Бу қанча тез бўлса, шунча яхши. Дортмундда, жамоада ўзимни жуда яхши ҳис қиляпман. Клуб билан алоқаларимиз ҳам ажойиб. "Боруссия Д" ғалабага ташна, уюшган ва ажойиб мухлисларга эга жамоа. Шартномамни узайтириб, бу ерда узоқроқ муддатга қолишни ҳам хоҳлайман, – дейди Мхитарян.
Эслатиб ўтамиз, Мхитаряннинг "сариқ-қоралар" билан тузган амалдаги шартномаси 2017 йилгача мўлжалланган. У бу мавсум Бундеслига ўйинларида 22 марта майдонга тушиб, 9 гол (12 пас)га муаллифлик қилган.
