Ҳозирги "Пахтакор" Саудия Арабистонининг гранд жамоасига қарши сафар ўйинида бехато ўйин эвазига ижобий натижага умид қилиши мумкин эди. Биринчи бўлимда жамоамиз "Ал-Ҳилол"га қарши жуда яхши ўйин намойиш қилди, аммо иккинчи бўлим...

"Пахтакор" ўйин бошидан тўпни назорат қила бошлади. Кўр-кўрона ҳужумга ўтмади, рақибни тўпсиз ўйнашга мажбур қилди. Бунда Жамшид Искандаров муҳим ролни ўйнади. Натижада "Ҳилол" ўз уйидаги ўйнаётганига қарамай, ўзи истаган ўйинни намойиш қила олмади.

Нўъмон Ҳасанов танлаган тактика учрашувнинг 31-дақиқасига келиб ўз самарасини берди. Вакилларимиз майдон марказида тўпни олиб қўйиб, ўнг қанотдаги Каримовга беришди. Жарима майдончасига кираётиб Сергеевнинг тўп сўраётганини кўрган Шерзод, дарҳол керакли йўналишда узатма берди. Игорь эса бош билан дарвозани ишғол қилди. Ўзбекистон чемпиони ушбу ҳисобн танаффусга қадар ушлаб қола олди.

Танаффусдан кейин эса "Ал-Ҳилол" ўз ўйинини кучайтирган бўлса, меҳмонларнинг ҳаракатларида хатолар кўпайиб кетди. Бу эса ўз самарасини бермай қолмади. Иккинчи бўлимнинг 55-дақиқасида мезбонлар бурчак тўпини ўйинга киритишди. Ораховац тўпни қайтариб, хавфни бартараф этгандек кўриинганди, бироқ такрорий узатма пайтида Квак Тэ Хви бош билан Зорийга узатма берди. Абдулла яқин масофадан Рибкин дарвозасига аниқ зарба бера олмади. Аммо орадан 2 дақиқа ўтиб Зорийнинг ўзи дарвозани ишғол қилди. Қанотдан етказилган тўпга чиқишда Рибкин хатога йўл қўйди ва тўп Ораховацнинг бошидан Абдуллага борди. Аз-Зорий бўш қолган дарвозани ишғол қилди. Ушбу хато "Пахтакор"нинг меҳнатларини пучга чиқариб қўйди.  

"Пахтакор" ҳали ўзига келиб улгурмасидан яна ўша Зорийнинг саъй-ҳаракатлари билан тўп жамоамиз дарвозасидан ўрин олди. Ярим ҳимоячининг чап қанотдан етказган узатмасини Ораховац бош билан дарвозага буриб юборди. 61-дақиқада Ал-Каъбий яккама-якка вазиятга чиқарилди ва Холид имкониятни қўлдан чиқармади — 3:1. Тан олиш керак, ҳали Олий лигада етарли тажрибага эга бўлмаган Никита Рибкин ОЧЛда ўйнашга ҳали тайёр эмаслиги аввалги ўйинда ҳам, бугун ҳам кўриниб қолди.

Олти дақиқа ичида "Ал-Ҳилол" томонидан урилган 3та гол амалда ўйин тақдирини ҳал қилиб қўйди. "Шерлар", табиийки, олдинга интилишди ва ўз дарвозаларидан тўртинчи голни ўтказиб юборишди. Чиройли комбинация натижасида Каъбий ўз ҳисобига иккинчи голни ёзиб қўйди.

"Пахтакор" иккинчи голга жуда яқин келди. Машарипов дарвозабон бирга бир вазиятга чиқди. Посбон қайтарган тўп ҳимоячига тегиб Жалолиддинга келди. Ярим ҳимоячимиз ётган ҳолатда бўш дарвозага зарба берди. Тўп тўсинга тегиб, майдонни тарк этди.

Ўйиннинг энг сўнгги сонияларида Шамроний "Пахтакор" посбони билан яккама-якка вазиятга чиқиб кетди ва зарба йўллади. Тўп Рибкиннинг қўлидан майдонни тарк этди.

Ушбу ғалабадан кейин "Ал-Ҳилол" ўз очколарини 4тага етказиб олди. 1 очко билан 3-ўринни эгаллаб турган "Пахтакор" кейинги 2та ўйинни гуруҳ пешқадами — Эроннинг "Тракторсозий" клубига қарши ўтказади.

ОЧЛ, "С" ГУРУҲИ,2-ТУР
"АЛ-ҲИЛОЛ" - "ПАХТАКОР" - 4:1
Голлар: Абдулла аз-Зорий (55), Аднан Ораховац (57), Холид ал-Каъбий (61, 80) —  Игорь Сергеев (31)
Огоҳлантиришлар: Камолиддин Тожиев (28), Даврон Ҳошимов (69), Жамшид Искандаров (86)
"Ал Ҳилол": 1.Холид Шараҳилий, 2.Муҳаммад ал-Бурайк, 3.Карлос Эдуардо (Муҳаммад ал-Қарний 74), 4.Абдулла аз-Зорий, 5.Аҳмад Шараҳилий, 9.Аилтон, 10.Муҳаммад аш-Шлҳуб, 11.Абдулазиз ад-Давсарий (Носир аш-Шамроний 59), 14.Сауд Каририй, 23.Квак Тэ Хви, 25.Файсал Дарвиш (Холид ал-Каъбий 46)
“Пахтакор”: 1.Никита Рибкин, 4.Аднан Ораховац, 7.Азимжон Аҳмедов (Акбар Исматуллаев 59), 8.Шерзодбек Каримов, 10.Жамшид Искандеров, 11.Игорь Сергеев, 15.Жавоҳир Соҳибов, 19.Суҳроб Бердиев (Жалолиддин Машарипов 63), 21.Камолиддин Тожиев, 24.Даврон Ҳошимов, 28.Станислав Андреев (Владимир Козак 70)
Ҳакамлар: Навоф Шукруллоҳ, Ёсир Тулефат, Муҳаммад Салмон, Аммар Маҳфуз (барчаси Баҳрайн).